دەرچووانی ئازیزی شەشەمین خولی زانکۆمان..

کەسوکاری خۆشەویستی دەرچووان..

مامۆستا و فەرمانبەرانی دڵسۆز.. ئامادەبووانی بەڕێز..

لە دەستپێکدا، بە ناوی سەرۆکایەتیی زانکۆی راپەڕین و لیژنەی باڵای ئاھەنگی شەشەمین خولی دەرچوانی زانکۆمانەوە، بە گەرمی بەخێرھاتنی ھەمولایەکتان دەکەین. وەکچۆن رازاوەترین چەپکەگوڵی پیرۆزبایی پێشکەشی سەرجەمی خوێندکارانی دەرچو و دایک و باوکی خۆشەویستییان دەکەین. بە پێویستیشی دەزانین، پیرۆزبایی و دەستخۆشیی تایبەت ئاراستەی مامۆستایانی دڵسۆز و ستافی کارگێڕیی زانکۆمان بکەین، کە سەرەڕای تەنگژەی دارایی و خراپیی باروگوزەران و بونی ئاستەنگە جیاوازەکانی بەردەم پرۆسەی خوێندن، لە ماوەی ئەو چەند ساڵەی خوێندندا، بەوپەڕی ھەستکردن بە بەرپرسیارێتییەوە و بە ھاوکاریی خوێندکاران و کەسوکارییان، توانیویانە خزمەتی بەرچاو بە رەوتی زانست و زانین بکەن، و ئەو پۆلە لە دەرچوان پێشکەشی نیشتمان و کۆمەڵ بکەن. هەر لەو سۆنگەیەشەوە، داواکارین حکومەتی ھەرێمی کوردستان، ئەرک و خزمەتی مامۆستا و فەرمانبەران بەھەندوەربگرێ و ھەوڵی جددی بدات بۆ چاککردنی گوزەرانییان. هاوکات، دامەزراندن، یان رەخساندنی هەلیکاری پێویست بۆ دەرچوانیش.

میوانانی بەڕێز.. دروشمی شەشەمین خولی دەرچوانی زانکۆمان، بریتییە لە (بەرەو ئایندەیەکی رۆشنتر)، ئەمەش لەو تێڕوانینە زانستی و مەعریفییەوە سەرچاوەدەگرێ، کەوا کاتێک بانگهێشتی خوێندکارانمان کرد بۆ درێژەدان بە خوێندنی زانکۆییان، (زانکۆی راپەڕین) هەڵبژێرن، پێمانگوتن (ئایندەتان رۆشن بکەنەوە)، ئێستاش دوای چوار ساڵ خوێندن و وەرگرتنی زانست و زانینی تایبەت بە پسپۆڕییەکانییان، بڕوامانوایە، بەرەو ئایندەیەکی رۆشنتر هەنگاودەنێن، لەمەشەوە، خۆرێکی گەش لە ئاسۆی نیشتماندا بەدیدەکەین.

میوانە بەڕێزەکان..
مامۆستاو فەرمانبەرانی زانکۆمان..
خوێندکارانی ئازیز..
بەناوی ئەنجومەنی زانکۆی ڕاپەڕینەوە بەخێرھاتنی گەرمتان دەکەین و سەری رێز بۆ گیانی پاکی فەخامەتی سەرۆک مام جەلال و سەرجەم شەھیدانی رێگای رزگاری کوردستان دادەنەوێنین، و رێز لە قوربانیدان و ماندووبونی برا پێشمەرگەکانمان دەگرین، ئەم دەستکەوتانەی ھاتونەتە دەست بەرھەمی قوربانیدانی ئەوانە، بۆیە لێرەوە بەڵێن دەدەین کە لەئاست نەبەردی و قوربانیدان و فیداکاری ئەواندا بین.
بەڕێزان ئەمڕۆ رۆژێکی گرنگ و مێژووییە بۆ زانکۆمان و دەڤەری راپەڕین، کە سەرکەوتوانە ئاھەنگی دەرچووانی خولی شەشەم بۆ پۆلێکی تر لەخوێندکارانی سەرکەوتوو دەگێڕین کە بەرھەمی چەندین ساڵەی شەونخونی دەرچووان و خانەوادەکانیانە. لەمڕۆوە سەرەتایەکی تازە دەستپێدەکات بۆ دەرچووانی ئەم خولە کە دەتوانن درێژە بەرەوتی خوێندن و کارکردن بدەن و بەشێکی دانەبڕاو و کاریگەربن لەھێنانەدی خەونی خۆتان و خانەوادەو گەلەکەتان.

ڕۆژی یەکشەممە ٢٠١٧/١٠/٢٢، زانكۆی ڕاپەڕین بەدروشمی (بەرەو ئایندەیەكی رۆشنتر)، لە ڕێوڕەسمێكی شایسته‌دا ڕێوڕەسمی شەشەمین خولی دەرچووانی بۆ (٩٥٣) خوێندکار سازدەکات.

سەبارەت بە ئامادەکارییەکانی ڕێکخستنی ڕێوڕەسمەکە، ئاراز رمچان ئەندامی لیژنەی باڵای ئامادەکاری رێوڕەسمی دەرچووان وتی: لەڕێگەی لیژنەیەکی باڵاوە زانکۆمان ئامادەکاری تەواوی کردووە بۆ بەڕێوەچوونی ڕێوڕەسمی شەشەمین خولی دەرچووان و لە ئێستادا سەرجەم ئامادەکارییەکان تەواوبوون.

ڕوونیشیکردەوە: ڕێوڕەسمەکە بۆ (٩٥٣) خوێندکاری دەرچوو لە کۆلێژەکانی (پەرستاری ، زانست ، پەروەردەی بنەرەت ، زانستەمرۆڤایەتییەکان ، کۆلێژی پەروەردە/قەڵادزێ ) ساز دەکرێت و سەرجەمیان بڕوانامەی بەکالۆریۆسیان لە پسپۆڕییەکانی خۆیان پێ دەبەخشرێت.